Күміс университеті: ұрпақтар сабақтастығы

2026 жылғы 18 наурызда Ш. Уәлиханов атындағы университеттің №3 Студенттер үйінің салтанат залында үш команда қатысқан «НАУРЫЗ – ҰРПАҚТАР САБАҚТАСТЫҒЫ» атты байқау өтті. «Ұлыс ұландары» командасы Қазақстан жастары арасынан құрылса, «Ынтымақ» командасы Моңғолияда тұратын қазақ диаспорасы жастарын біріктірді, ал «Шаңырақ» командасын Күміс университетінің тыңдаушылары құрады.

Жаңару мен келісімнің, жаңа өмірдің бастауы саналатын Наурыз мерекесі байқаудың өзегіне айналып, оның басты мақсаты – ұрпақтар арасындағы байланысты нығайту, ұлттық дәстүрлерді дәріптеу және бірлік пен өзара құрмет атмосферасын қалыптастыру болды.

Қатысушылар бірнеше кезең бойынша өз білімдерін, шығармашылық қабілеттерін және командалық рухтарын көрсетті. Зияткерлік сайыстар қазақ халқының тарихы, салт-дәстүрлері, ұлттық тағамдары, әдет-ғұрыптары, ұлттық ойындары мен даналығы туралы білім алмасуға мүмкіндік берді.

Іс-шараның жарқын сәттерінің бірі «Салт-дәстүр сахнада» атты шығармашылық кезең болды. Бұл кезеңде командалар қазақ халқының бай салт-дәстүрлерін сахналық қойылымдар арқылы көрсетті.

Байқау қорытындысы бойынша бас жүлдені жоғары дайындық деңгейін, ұйымшылдығын және ұлттық дәстүрлерді терең меңгергенін көрсеткен «Шаңырақ» командасы иеленді.

Іс-шара жылы әрі мерекелік атмосферада өтіп, ұрпақтар сабақтастығы мен мәдени мұраны сақтаудың жарқын үлгісіне айналды. Қатысушылар мұндай шара дәстүрге айналсын деген тілек білдірді.