Ш. Уәлиханов атындағы Көкшетау университетінде мектеп оқушыларының «Мектеп және университет: ғылыми ынтымақтастық көкжиектері» атты конференциясы өтті. Аталған шара өңір мектептерінің оқушыларын біріктірді
Конференция жұмысына әртүрлі ғылым салалары бойынша өз зерттеу жобаларын ұсынған оқушылар қатысты. Барлығы 15 секция ұйымдастырылып, олардың аясында қатысушылар жоғары дайындық деңгейін, зерттеу жүргізу, нәтижелерді талдау және өз жобаларын сенімді қорғау қабілеттерін көрсетті.
Секциялардың жұмысы сындарлы әрі достық атмосферада өтті. Қазылар алқасы ұсынылған тақырыптардың өзектілігін, зерттеулердің практикалық маңыздылығын және оқушылардың ғылыми ізденіске деген қызығушылығын атап өтті.
Конференция қорытындысы бойынша үздік жұмыстар I, II және III дәрежелі дипломдармен, сондай-ақ арнайы дипломдармен марапатталды. Жеңімпаздар мен жүлдегерлерге бағалы сыйлықтар табысталды. Конференция мектеп пен университет арасындағы ынтымақтастықты нығайтуға және оқушылардың зерттеушілік дағдыларын дамытуға ықпал етті.
Барлық қатысушыларға, ғылыми жетекшілерге, қазылар алқасының мүшелеріне және ұйымдастырушыларға конференцияны табысты өткізуге қосқан үлестері үшін алғыс білдіреміз.