Есептеу техникасы және бағдарламалық қамтамасыз ету (Компьютерлік жүйелер менжелілердің қауіпсіздігі)

Оқыту нәтижелері және құзыреттер

• Бағдарламалық қамтамасыз етуді (БҚ) әзірлеу процестерінің әрекеттеріне талдау жүргізу, БҚ әзірлеу үшін стандарттарды, әдістерді, құрал-саймандарды және бағдарламалау тілдерін таңдауды негіздеу, БҚ-ның жобалық және пайдалану құжаттамасын әзірлеу.
• Деректер құрылымдарын оңтайлы таңдау, алгоритмдерді әзірлеу және оларды бағдарламалау тілдерінде (БТ) іске асыру, БҚ бастапқы кодын жөндеу және талдау, есептік құжаттаманы дайындау.
• Дерекқорларды (ДҚ) жобалау қағидаттарын, сұраныстарды оңтайландыру әдістерін, ORM-жүйелерін, деректерді көшіру және түрлендіру рәсімдерін қолдану; БҚ жұмысқа қабілеттілігін бағалау, үлгілік дерекқорларды жобалау, дерекқормен жұмыс істеуге арналған функционалдылықты әзірлеу, тиісті ORM-жүйелерін таңдау және пайдалану, дерекқорлардың қауіпсіздігін қамтамасыз ету; виртуалдандыру технологиялары мен ресурстарды бірлесіп басқару қағидаттарын түсінетінін көрсету; есептеу және/немесе деректер ресурстары үшін бұлттық инфрақұрылымды пайдаланатын қосымшаны орналастыра білу; тапсырмаларға негізделген декомпозицияны немесе деректер параллелизмінің декомпозициясын қолдана отырып, дұрыс әрі масштабталатын параллель алгоритм әзірлеу; деректерді интеллектуалды талдауды тиімді қолданудың әртүрлі әдіснамаларын бағалай білу.
• Компьютерлік жүйелер мен желілердің аппараттық, бағдарламалық және бағдарламалық-аппараттық құралдарының архитектурасы мен жұмыс істеу қағидаттарын білуін көрсету; бақылау-өлшеу құралдарымен жұмыс істей білу, операциялық жүйелерді конфигурациялау; ақпаратты қорғаудың ұйымдастырушылық-құқықтық негіздерін, ақпараттық қауіпсіздік саясатының негізгі түрлерін, ақпараттық активтерге төнетін тәуекелдерді анықтау әдістерін білуін көрсету; ақпараттық қауіпсіздік тәуекелдерінің матрицасын құра білу, ақпараттық қауіпсіздік мониторингін жүзеге асыру, желілік құрылғылар мен операциялық жүйелердегі ақаулар мен істен шығулардың салдарын жою.
• Телекоммуникациялық жүйелерде деректерді беру және өңдеу кезінде қателерді түзетуге арналған бағдарламалық-аппараттық құралдарды әзірлеу және пайдалану, криптографиялық примитивтерді қолдану және оларға жасалатын шабуылдармен байланысты қауіпсіздік қатерлерін бағалау; бағдарламалық қамтамасыз етуді әзірлеудің өмірлік цикліне қауіпсіздікті енгізу талаптарын және бағдарламалық кодтағы осалдықтарды барынша азайтудың үздік тәжірибелерін білу; бағдарламалық қосымшаның қауіпсіздігін статикалық және динамикалық тексеру мен бағалау қабілетіне ие болу.
• Есептеу техникасы құралдарының аппараттық қамтамасыз етуінің жұмысқа қабілеттілігін диагностикалау, ақаулар мен істен шығуларды жою; бақылаулар мен өлшеулер жүргізу, нәтижелерді құжаттау және тиісті түрде рәсімдеу; өлшеу деректерінің маңыздылығы мен теорияға сәйкестігін ескере отырып, оларды түсіндіру және өңдеу.
• Кәсіби пәндердің негізгі ұғымдарын меңгеру, техникалық ғылымдар бойынша алған білімдері мен әдістерін кәсіби қызметте пайдалану; ғылыми және кәсіби қызығушылықтарына сәйкес мамандық бойынша кәсіби қызметті жүзеге асыруға дайын болу; өз мамандығы бойынша негізгі теориялық және практикалық білімдерді меңгеру; әртүрлі деңгейдегі бағдарламалық қамтамасыз етуді жобалау және әзірлеу; өз қызметін ұйымдастыру, кәсіби міндеттерді орындаудың әдістері мен тәсілдерін анықтау және олардың тиімділігін бағалау қабілетіне ие болу.
• Кәсіби міндеттерді шешу кезінде математикалық талдаудың, дискретті математиканың, ықтималдықтар теориясы мен математикалық статистиканың, ақпарат теориясының және сандар теориясының тиісті математикалық аппаратын, әдістері мен алгоритмдерін қолдану; есептеу жүйелері мен желілерінің заманауи құрылғыларының жұмысындағы физикалық құбылыстар мен процестер туралы білімін көрсету, физикалық процестерді модельдеу; эксперименттік зерттеулер жүргізу және эксперимент нәтижелерін өңдеу.
• ЭЕМ архитектурасын, көппроцессорлы және көпмашиналы есептеу жүйелерін ұйымдастыру қағидаттарын, жүйелік бағдарламалаудың негізгі тұжырымдамаларын білу; заманауи компьютерлердің, жүйелер мен желілердің архитектурасын негіздеу; API-функцияларын пайдаланып бағдарламалар әзірлеу; ұйымның жүйелік қауіпсіздігін қамтамасыз ету үшін операциялық жүйелерге енгізілген механизмдерді қолдану, жүйелік әкімшілендіру дағдыларын меңгеру; алгоритмдерді практикалық іске асыру және БҚ бастапқы кодын жөндеу үшін заманауи бағдарламалау орталары мен тілдерінің мүмкіндіктерін пайдалану.
• Ғаламдық компьютерлік желілер мен корпоративтік ақпараттық жүйелердегі ақпаратты талдау; ақпаратты алу, іріктеу және өңдеу құралы ретінде заманауи ақпараттық-коммуникациялық технологияларды меңгеру; мемлекеттік, орыс және ағылшын тілдерінде талдамалық құжаттаманы рәсімдеу және таныстыру; салауатты өмір салты туралы әлеуметтік маңызы бар қағидаттарды ұстану.
• Тарихи оқиғалар мен процестерді зерделеу кезінде аналитикалық және аксиологиялық талдау жүргізу; философиялық пікірталастарға қатысу және қазіргі заманның өзекті мәселелері бойынша өз ұстанымын дәлелді түрде қорғау; мемлекет пен құқықтың мәнін түсіну, болашақ кәсіби қызметінің әлеуметтік маңызы бар мақсаттарын тұжырымдау; өзгерістер қарқыны үдей түскен және қазіргі заманғы жағдайлардың сын-қатерлері артқан жағдайда кәсіби қызметінің түрлері мен сипатына психологиялық тұрғыдан дайын болу.
• Өз бизнесін құру және дамыту үшін бірлескен талдау, жобалау және шешім қабылдау әдіснамаларын қолдану; еңбек қызметіндегі күрделі жағдайларда шешімдер қабылдау, міндеттерді шешу үшін командалық жұмысты ұйымдастыру; басқарушылық шешімдерді әзірлеу және оларды тәжірибеде іске асыру бойынша ұйымдастырушылық жұмыстарды жүргізу; кәсіби іскерлік қарым-қатынастың сөйлеу жағдаятына бағдарлану, ұсынылған іскерлік қарым-қатынас жағдайында коммуникативтік стратегия мен сөйлеу тактикасын анықтау; кәсіби салада креативтілікке және жаңа идеяларды табысты іске асыруға ынталану; өздігінен білім алуға, жалпы интеллектуалдық және мәдени деңгейін жетілдіруге қабілетті болу; сыбайлас жемқорлық әрекеттеріне төзбеушілік таныту, құқық пен заңды құрметтеу.